சென்னை:
இந்த ஆண்டு உருவாகியுள்ள வலுவான “சூப்பர் எல் நினோ” காரணமாக, வரும் செப்டம்பர் 2026 முதல் பிப்ரவரி 2027 வரை உலகம் முழுவதும் சுமார் 4.51 லட்சம் கூடுதல் வெப்பம் தொடர்பான உயிரிழப்புகள் ஏற்படக்கூடும் என அமெரிக்காவின் சிகாகோ பல்கலைக்கழகத்தின் Climate Impact Lab வெளியிட்ட புதிய அறிக்கையில் தெரிவிக்கப்பட்டுள்ளது.
இந்தியாவில் 15,800 உயிரிழப்புகள்?
இந்தியாவில் மட்டும் சுமார் 15,800 கூடுதல் உயிரிழப்புகள் ஏற்படக்கூடும் என ஆய்வு கணித்துள்ளது. இதில் கிட்டத்தட்ட பாதி உயிரிழப்புகள் டிசம்பர் முதல் பிப்ரவரி வரையிலான காலகட்டத்தில் ஏற்படக்கூடும் என தெரிவிக்கப்பட்டுள்ளது.
எந்தெந்த நாடுகளில் எவ்வளவு?
ஆய்வில், நைஜீரியாவில் 31,400, இந்தோனேசியாவில் 19,300, சூடானில் 17,500, இந்தியாவில் 15,800, பிரேசிலில் 13,300, நைஜரில் 10,000, சாடில் 8,000 கூடுதல் வெப்பம் தொடர்பான உயிரிழப்புகள் ஏற்படக்கூடும் என மதிப்பிடப்பட்டுள்ளது. மேலும், பிலிப்பைன்ஸ், வியட்நாம், தாய்லாந்து மற்றும் கம்போடியா ஆகிய 4 நாடுகளில் சேர்த்து சுமார் 19,400 கூடுதல் உயிரிழப்புகள் ஏற்படக்கூடும் என தெரிவிக்கப்பட்டுள்ளது.
வெப்பத்தின் தாக்கம் அதிகரிக்கலாம்
சூப்பர் எல் நினோவின் தாக்கத்தால் உலகின் பல பகுதிகளில் வழக்கத்தை விட அதிகமான வெப்பநிலை நிலவக்கூடும். மேலும், வரும் மாதங்களில் உலக நிலப்பரப்பின் வெப்பநிலை இயல்பை விட சுமார் 1.2°C அதிகமாக இருக்கலாம் என்றும், மிகவும் அதிக வெப்பம் நிலவும் நாட்களின் எண்ணிக்கை 44% வரை அதிகரிக்கலாம் என்றும் ஆய்வு கூறுகிறது. குறிப்பாக வெப்பத்தால் அதிகம் பாதிக்கப்படக்கூடிய முதியவர்கள் மற்றும் உடல்நலப் பிரச்சினைகள் உள்ளவர்கள் அதிக ஆபத்தை எதிர்கொள்ளக்கூடும் என ஆய்வாளர்கள் தெரிவித்துள்ளனர்.
இது உறுதியான உயிரிழப்பு எண்ணிக்கை அல்ல
4.51 லட்சம் மற்றும் 15,800 ஆகியவை ஏற்கனவே பதிவான உயிரிழப்புகள் அல்ல. எல் நினோவால் ஏற்படக்கூடிய கூடுதல் வெப்பத்தின் அடிப்படையில் ஆய்வாளர்கள் உருவாக்கிய முன்னறிவிப்பு மதிப்பீடுகள் ஆகும்.